Ebeee !!

Baru Kamarin Tau Dunia Mo Lekos Orang, Puiii !!

MEMANG garap kalu mo liat modelnya orang yang baru tau dunia. Maklum sangaja dibilang bagitu karna ada carita tentang itu om yang so jadi orang sanang waktu hidup di jakarta, maksudnya orang kaya baru, kira-kira bagitu.

 

Tapi biar dia so lama di sana, ternyata masih tetap dapat liat depe mangkage karena Depe bacarita talalo kantara Depe latabu, baru biar lagi depe gaya hidup mo bapaksa ba canggih-canggih, tetap masih tacampur deng model kampungan, karna memang orang luk bilang depe asli yang sebenarnya dari kampung. Nohh model orang mangkage bagini ini kalu mo di liat-liat, pasti garap skali kan?

Sebenarnya orang te’mo gubris deng ini Om Latabu pe asal usul yang dari kampung itu, karna lantaran depe lekos talalo kantara skali, makanya dong cuma angkat-angkat pa dia, biar puas depe makan puji sampe nanti puji yang mo makan pa dia.

Hmmm,,  !! So bagitu memang kalu orang yang tiba-tiba ba dapat nasib bae, alias setan tolak kon so jadi orang sanang Kon selalu mangaku kaya raya. Apalagi so di branding deng pangilan orang kaya baru nohh bukan tambah jadi depe bikin diri, dia te’ tau kalu itu pujian samua cuma abis di bue nya orang yang pang bajilat pa dia. hehehehehe !!.

So tau toh kalu orang yang barasa diri so kaya,  pasti depe carita yang harus lebe banyak di dengar kan?. Nohh coba-coba kalu mo di bantah depe carita atau mo di cuek akan, berarti so disitu ngana pe kempes, dia te mo pake ngana, kira-kira bagitu yang dong bilang.

Makanya orang model bagini, musti pintar-pintar kalu mo ambe depe hati,  musti pake jurus kompresor alias patende.  Kalu perlu usahakan di pompa turus pa dia deng kompresor 16 tabung, supaya depe hati sanang turus, deng bagitu so pasti peleput akan ta lucur turus.

Itu dulu pe carita, waktu baru pertama ini Om Latabu datang pulang kampung kon so ba tinggal di luk.

Tapi kalu mo liat skarang yang depe model so kantara skali seblas dua blas deng Abunawas pe lekos, hmmmm !! orang luk cuma mo por-por akan saja. Karena rupa-rupanya ada bocoran kalu depe kekayaan itu cuma abis di strategi flexing. Atau sangaja di sebarkan informasi bahwa dia itu kaya raya, padahal cuma modal tupe juga sama orang-orang kaya di jakarta. Karena dong bilang kata, itu doi yang bikin dia kaliatan kancang sebenarnya jaminannya itu orang-orang kaya asli di jakarta yang nanti mo ba ser-ser datang ba bisnis proyek raksasa di sini.

Jadi depe kesimpulan deini sebenarnya hanya jadi alat yang di poles supaya depe modal carita lekos nanti bisa capat di percayanya orang banyak di luk,  kon nanti bagitu ada kesempatan itu proyek basar so ditangan, baru depe mitra satu-satu mulai balucur datang mancari di sini, karna kalu mo dengar orang-orang luk pe carita, doi yang di titip sama itu om latabu, te’ lawan deng kauntungan proyek yang nanti itu orang – orang dari jakarta mo palo disini.

Makanya waktu ini barang mulai tacium, orang-orang luk cuma monkase ingat sama itu om Latabu yang mangkage ini, dekira depe trik itu te di tau, “calana tua itu bos” bagitu dorang bilang kata. Makanya dorang cuma bilang tunggu saja nanti, satu waktu KPK yang mo loku pa dia. “Haaaa  butulkah itu?  hmhmhm!!”. **

Show More

Tinggalkan Balasan

Alamat email Anda tidak akan dipublikasikan. Ruas yang wajib ditandai *

Back to top button